Rev 14 | MHL | STEP | Aria yo mokoka wuam-na Sipsip Muuka Yerusalem owowa Saiyon ema-pa iimarep ikaeya urufam. Mua 144,000 naap o wameiya ikemik, wi teeria nain Sipsip Muuka ona wiawi ikos unuma ekima-pa wiar ikomakek.

Revelation of John 14

Teeria maneka someka enuma awemik

1 Aria yo mokoka wuam-na Sipsip Muuka Yerusalem owowa Saiyon ema-pa iimarep ikaeya urufam. Mua 144,000 naap o wameiya ikemik, wi teeria nain Sipsip Muuka ona wiawi ikos unuma ekima-pa wiar ikomakek. 2 Naap ikemkun iwakara-ke eka maneka duunowa ne aapereka paranowa naap akena imenarem-ikua. Duunowa nain wi mua gita paiwkin aluiya, naap akena imenarem-ikaeya miimam. 3 Wi teeria maneka nain-ke Mua Maneka, aria wi maa erepam mokok enuma ikemik nain ne wi iperowa, wi nain miir onoma-pa wiar iimarep ikok someka enuma awem-ikemik. Someka nain wiena mua teeria miiwa-pa wia sesenarep wia aawok, wi 144,000 nain-ke amisaremik, ne miiw mua unowa weetak. 4 Wia aawok teeria nain wi emeria wiamiya sira samora me onam-ikemik, sira dubil akena ikemik. Wi me wadolalimik, pina marew akena ikemik. Anane Sipsip Muuka ookam-miawimik. Miiw mua unowa nain wi teeria nain maa eremina patirimik saarik Mua Maneka ona Sipsip Muuka ikos kemena wiar ekamik.

Ensel arow

6 Ne aria kiiriw nainiw ensel oko urufam, aapereka iinan-pa birinem-ikua. Krais opor eliwa anane ikaiya nain wi miiw mua wia maakekam naep onak, wi mua mia sira-sira nain, wi owow ononer ne miiwa ononer nain. 7 Birinemi farem-miek, “Ni Mua Maneka manek akena keker opami unuma wiar fakeram-ikeka! Moram miiw mua wia mekawap sira kakeniw wia kiripiya nain epa fan imenarek. O eena aapereka, miiwa, ifera ne eka opora onomakek nain-ke, o lotu oneka.”

8 Ne ensel oko-ke imenarep birinemi farem-ikua, “Oo Babilon, nan samorarek, Babilon owow maneka samorarek oo! Miiw unowa mua unowa eka kekanowa wienakowa saarik wia mufeya Mua Maneka piipuamik. O nain aakisa samorarek.”

9 Ne ensel oko-ke imenarep birinemi kerewa farem-ikua, “Wi mua maa eneka asia nain ne ona miira siraremik nain lotu onamik, ne wiena ikiwosa-pa e wapena-pa siisia wiar aawemik nain pun Mua Maneka bagiaw maneka wiar urufikuan. Nain feenap, ona bagiaw wain kekanowa akena saarik urupa-pa ototeya ikua, wi enep feenap samor aawikuan. Wi teeria nain ikoka wi ensel ne Sipsip Muuka wia urufam-ikaiwkin mukuna ne nomon yoowa-pa wia wafurikuan. Naeya sirirowa aawem-ikaikuan. 11 Wi sirirowa aawimik nain mukun kawus anane maneka naap urupem-ikainon. Wi nain maa eneka asia ne ona miira siraremik nain lotu onami unum siisia wiar aawemik nain anane amirika ne uura sirirowa naap aawem-ikaikuan, oram ikowa marew.” 12 Naapeya wi Yeesus teeria Mua Maneka sira makena wiar ookimik ne wia samoriwkin kekanep ookowa me piipuimik nain wi kekanep ikauk.

13 Naap ikok opor oko owow iinan-pa imenareya miimam, efa maakek, “Feenap siisime, wi mua eena Mua Maneka teeria-pa wiar ikok epa fain umimik nain ne ikoka umikuan nain, wi kema eliwa ikauk!” Ne aria Ewar Eliwa-ke opora kiripomami maek, “No makena main, wi teeria nain iiriw uuwow yoowa onam-ikemik, wi aakisa uurarowa aawuk. Moram, wi sira eliwa onamik nain ariman ikaeya amisarikuan.”

Maa enowa parewow epa imenarek

14 Ne yo iinan mokakem-na maa ipisia kia urufam. Mua oko Mua Muuka saarik nain-ke maa ipisia iinan-pa pokap ikua. Mua nain ikiwos maa bala gol-pa onimik nain onaiya ikua, ne fura meka anim onaiya ikua nain opap ikua. 15 Ne ensel oko-ke tempel koor kemena-pa ikok oromi mua maa ipisia iinan-pa pokap ikua nain faremi maek, “Nena fura opap ikon nain-pa maa enowa waromake. Moram aakisa miiw unowa maa enowa parewomakek, maa enowa iirarowa epa kererek.” 16 Naap maakeya mua maa ipisia iinan-pa pokap ikua nain-ke fura opak nainiw enowa waromakek.

17 Ne kiiriw ensel oko-ke owow iinan tempel kemena-pa ikok orok. Os pun fura meka naap nain opap feekiya orok. 18 Ne ensel oko patirow esimsa mukuna urufiya, nain-ke esimsa mamaiya-pa ikok imenaremi ensel fura onaiya ikua nain faremi maek, “Wain makena biliwarep iiwawun erap ikomakek. Makena uuma onaiya pu-puuk-ikiwe.” 19 Naap maakeya ensel nain-ke wain uma onaiya pu-puukap makena ititimik epa nan wafufurak. Nain Mua Maneka bagiaw wiar kukusimok. 20 Epa nain owow maneka sisina-pa ikua, makena ara nan ititamik. Ititiwkin wain eka nain aka imenaremi eka luuma maneka saarik taanep epa maneka nain aka-ke muok. Aka nain taanek nain oos iimarinon-na ikip opaimik ona pepek erap ikainon, ne aka epa ifemakep ikiwok nain epasia akena, mail andet erup naap.